Bjóða Vopnfirðingum að sækja sér mjólk
Fréttir • This email address is being protected from spambots. You need JavaScript enabled to view it. • Fyrst birt 31. mar 2024 14:22 • Uppfært 31. mar 2024 14:23
Félagsbúið Engihlíð í Vopnafirði hefur boðið Vopnfirðingum að koma og sækja sér mjólk. Ekki hefur verið sótt mjólk þangað frá því fyrir helgi vegna ófærðar.
„Það var ekki hægt að sækja til okkar í gær og þá var ljóst að ekki yrði hægt að gera það í dag heldur. Við erum í hámarksframleiðslu núna þannig við erum að drukkna í mjólk.
Þess vegna datt okkur í hug að bjóða upp á þetta. Við megum gefa mjólkina frá okkur svona,“ segir Gauti Halldórsson, bóndi í Engihlíð.
Hann segir að undanfarið hafi fólk úr nágrenninu, einkum af erlendum uppruna, sýnt áhuga á að fá mjólk frá Engihlíð og gera úr því osta og fleiri mjólkurvörur. Þess vegna hafi hugmyndin komið upp þegar tankarnir tóku að fyllast í gær.
„Það komu nokkrir í gær. Í dag er kolvitlaust veður. Við erum að reyna að koma þessu í kálfa, öðru þarf að hella niður. Það þýðir þó ekkert að kvarta, svona er þetta,“ segir Gauti.
Ófært er um bæði Sandvíkurheiði og Vopnafjarðarheiði til Vopnafjarðar í dag. Ófærð er víðar á Austurlandi. Möðrudalsöræfi eru lokuð og þá hefur verið gefið út að Fjarðarheiði verði ekki opnuð í dag.
