Bólusetningar gengu vel á Vopnafirði í gær
Á fjórða tug barna á Vopnafirði fengu í gær bólusetningu við mislingum. Gripið var til aðgerðanna eftir að smit kom upp í nærsamfélaginu um helgina. Fleiri tilfelli hafa ekki greinst enn.Börn á Íslandi eru vanalega bólusett fyrst við 18 mánaða aldur og svo aftur 12 ára. Við sérstakar aðstæður, eins og þær sem nú eru uppi á Norðausturhorninu, má færa þann aldur niður í sex mánuði og seinni sprautuna fjórum vikum síðar.
Pétur Heimisson, framkvæmdastjóri lækninga hjá Heilbrigðisstofnun Austurlands, segir að í gær hafi á fjórða tug barna á Vopnafirði, sem ekki lék grunur á að væri í smithættu og töldust ekki fullbólusett, verið bólusettur. Sú vinna gekk mjög vel.
Einstaklingur á Þórshöfn greindist um helgina með mislinga. Hann hafði sótt þjóðahátíð sem haldin var á Vopnafirði sunnudaginn 14. apríl. Meðgöngutími mislinga getur verið 1-3 vikur og geta einstaklingar smitað aðra í allt að fjóra daga áður en þeir finna sjálfir til einkenna.
Pétur segir að þess vegna sé áfram vandlega fylgst með stöðunni. Ekkert nýtt smit greindist í gær.
Einstaklingum sem finna fyrir einkennum sem líkjast mislingum er bent á að hafa samband við lækna í síma 1700. Nánari upplýsingar um mislinga og viðbrögð við þeim má finna á vef HSA.
