Breiðdælir löngum vitað að dalurinn búi yfir miklum verðmætum
Fréttir • This email address is being protected from spambots. You need JavaScript enabled to view it. • Fyrst birt 22. maí 2010 12:37 • Uppfært 08. jan 2016 19:21
Páll Baldursson, sveitarstjóri Breiðdalshrepps, segir Breiðdæli ekki undrandi á að ástralskt málmleitarfyrirtæki vilji leita eftir gulli á svæðinu. Heimamenn séu samt jarðbundnir.
„Breiðdælir hafa löngum vitað að landið þeirra og dalurinn allur búi yfir miklum verðmætum, þannig að út frá því kemur það okkur ekki á óvart að menn vilji rannsaka svæðið,“ sagði Páll í samtali við agl.is.Agl.is greindi í gær frá áhuga ástralska fyrirtækisins Platina Resources á að rannsaka hvort gull finnist í vinnanlegu magni á Austurlandi. Breiðdalur er eitt af þeim þremur svæðum sem fyrirtækið hefur sérstakan áhuga á.
Á Breiðdalsvík er starfandi setur í nafni breska eldfjallafræðingsins George Walker sem rannsakaði og kortlagði austfirsk berglög á sjötta og sjöunda áratug seinustu aldar. Páll segir áhuga Ástralanna sérstaklega fróðlegan í ljósi þess að „höfum verið á undanförnum misserum að minna á jarðfræði svæðisins og hinar fornu megineldstöðvar.“
En þótt svæðið verði rannsakað er langt í að gull verði unnið úr austfirskri jörðu. „Varðandi framhaldið þá held ég að Breiðdælir séu nokkuð jarðbundnir í þessum efnum.“
