Dæmdur fyrir að hóta lögreglumönnum lífláti
Fréttir • This email address is being protected from spambots. You need JavaScript enabled to view it. • Fyrst birt 29. mar 2013 21:42 • Uppfært 08. jan 2016 19:24
Karlmaður á þrítugsaldri var nýverið dæmdur í þrjátíu daga skilorðsbundið fangelsi í héraðsdómi Austurlands fyrir að hóta lögreglumönnum á vakt líkamsmeiðingum og lífláti.
Maðurinn hótaði tveimur lögregluþjónum eftir að hann hafði verið tekið tökum og haldið föstum í aftursæti lögreglubifreiðar. Verið var að fara með hann frá Reyðarfirði til Eskifjarðar.
Maðurinn játaði brot sitt greiðlega, enda til upptökur á því úr bílnum. Hann sagðist iðrast gjörða sinna. Þetta var metið honum til refsilækkunar.
Hann hefur áður komist í kast við lögin, fyrir brot á hegningarlögum, umferðarlögum og reglum um ávana- og fíkniefni. Hann hefur ekki áður verið fundinn sekur um ofbeldisbrot.
Dómnum þótt því skilorðsbundið fangelsi í 30 daga til tveggja ára hæfileg refsing. Honum var að auki gert að greiða ríflega 140 þúsund krónur í málskostnað.
