Díoxínsýni tekin í Reyðarfirði
Niðurstaðna úr mælingum á magni díoxíns í jarðvegi við álverið í
Reyðarfirði er að vænta seinni part júnímánaðar. Sýnataka hefur staðið
yfir seinustu tvær vikur víða um land í átaki Umhverfisstofnunar.
Í kjölfar þess að mikil díoxínmengun uppgötvaðist í nágrenni sorpbrennslustöðvarinnar Funa á Ísafirði í byrjun árs ákvað Umhverfisstofnun að rannsaka styrk díoxíns víða um land.
Gert er ráð fyrir að sýnatöku ljúki í vikunni en sýni hafa verið tekin í grennd við starfandi og aflagðar sorpbrennslur, sorpflokkunarstöð, stærstu iðjuver/verksmiðjur, þar með talið við álverið í Reyðarfirði, á völdum svæðum fyrir árlegar opnar brennur sem og á viðmiðunarstöðum þar sem ekki er að vænta díoxín uppspretta af manna völdum.
Jóhanna Björk Weisshappel, sérfræðingur á sviði umhverfisgæða hjá stofnuninni, segir að sýni verði tekin á tveimur stöðum í nágrenni við álverið. Að auki verði tekin viðmiðunarsýni í Seyðisfirði. Niðurstaðna er að vænta í síðasta lagi 20. júní.
