Dregur til tíðinda í framboðsmálum í Múlaþingi
Fréttir • This email address is being protected from spambots. You need JavaScript enabled to view it. • Fyrst birt 10. mar 2022 15:33 • Uppfært 10. mar 2022 15:34
Framboðslistar fyrir sveitarstjórnarkosningarnar í vor birtast nú einn af öðrum. Þrjú framboð í Múlaþingi munu taka ákvarðanir um sína lista á næstu dögum.
Sjálfstæðisflokkurinn stendur fyrir prófkjöri á laugardag. Átta frambjóðendur eru í því. Það er bindandi fyrir fimm efstu sætin.
Vinstrihreyfingin – grænt framboð verður með súpufund í Tehúsinu á Egilsstöðum í hádeginu á sunnudag þar sem listi framboðsins verður kynntur. Svandís Svavarsdóttir, matvælaráðherra og Bjarkey Olsen Gunnarsdóttir, þingmaður flokksins í Norðausturkjördæmi, verða gestir fundarins.
Þá hefur Framsóknarfélag Múlaþings boðað til félagsfundar í Austrasalnum á Egilsstöðum næsta miðvikudagskvöld. Þar verður tillaga uppstillingarnefndar að framboðslista lögð fram.
Um síðustu helgi var framboðslisti Austurlistans staðfestur.
