Eftirspurn, lífsgæði og náttúra en lítt gengur að fjölga íbúum Austurlands
Allnokkuð fleiri íbúar bjuggu á Austurlandi árin 1970, 1980 og 1990 en gera þann herrans dag 8. maí 2025 samkvæmt útreikningum Hagstofu Íslands þrátt fyrir að heilt álver hafi tekið til starfa í millitíðinni í fjórðungnum. En hvernig má fjölga íbúum svæðisins og hvernig verður það best gert?
Það er spurning dagsins á sérstöku málþingi sem Austurbrú stendur fyrir í gamla skólanum að Eiðum á morgun föstudag og hefst það þing klukkan 13 stundvíslega. Fyrirsögn fundarins er Fjölmennara Austurland og eins og nafnið gefur til kynna er íbúafjölgun á svæðinu þema fundarins.
Málefnið mikilvægt mjög því sífellt fjölgar þeim einstaklingum sem setja sig niður á suðvesturhorni landsins og berjast þar hart um hvern einasta fermetra íbúðarhúsnæðis og ekki síður mikið til sömu störfin. Það á sama tíma og austanlands eru húsnæðismál að batna hratt, eftirspurn hefur lengi verið eftir auknu vinnuafli og laun jafnvel nokkuð yfir pari samanborið við það sem gerist annars staðar í landinu.
Til að reyna að svara ofangreindri spurningu verða tveir fræðimenn með erindi af þessu tilefni. Þar fyrstur Jón Þorvaldur Heiðarsson, hagfræðingur við Háskólann á Akureyri en í kjölfarið bætir Vífill Karlsson, prófessor við Háskólann að Bifröst, við sinni sýn. Í lokin stíga á stokk þrír ungir Austfirðingar sem lýsa því hvað hugsanlega vanti á Austurlandið til að heillandi geti verið fyrir fólk að gera sér langtímabúsetu í fjórðungnum.
Málþingið hefst í kjölfar ársfundar Austurbrúar og aðalfundar Samtaka sveitarfélaga á Austurlandi sem fram fara fyrr um daginn og eru allir áhugasamir velkomnir.
