Ekkert vesen þrátt fyrir krapa á Fjarðarheiði í morgun
Fréttir • This email address is being protected from spambots. You need JavaScript enabled to view it. • Fyrst birt 05. júl 2023 09:59 • Uppfært 05. júl 2023 10:08
Umferð yfir Fjarðarheiði hefur gengið vandræðalaust í morgun þrátt fyrir að krapi hafi verið á leiðinni. Slíkt er blessunarlega sjaldséð í júlí en getur þó gerst.
„Það hefur ekki orðið neitt stórkostlegt vesen. Það var hiti í veginum og hann auðnaðist ágætlega,“ segir Jens Hilmarsson, yfirverkstjóri hjá Vegagerðinni í Fellabæ.
Í gærmorgunn gránaði í fjöll á Austurlandi og í nótt bætti í. Jens segir að á Fjarðarheiðinni hafi krapi verið á hæsta hluta hennar, frá vatni að Norðurbrún.
Vegagerðin varar nú við hálkublettum þar. Fyrst í morgun var einnig varað við hálkublettum á Möðrudalsöræfum. Jens segir það hafa verið óverulegt og er sú leið nú merkt greiðfær.
Búist er við rigningu eystra fram yfir hádegið. Síðan er von á þurrara og hlýrra veðri með 20 stiga hita um helgina.
Mynd: Vegagerðin
