Ekki byrjað á Fjarðarheiðargöngum fyrr en 2025
Ekki er áætlað fjármagn til Fjarðarheiðarganga í drögum að nýrri samgönguáætlun fyrr en árið 2025. Nýjum vegi yfir Öxi seinkar nema að fjármagn finnist frá einkaaðilum. Byrjað er á nýrri flugstöð í Reykjavík áður en Egilsstaðaflugvöllur er stækkaður. Framkvæmdum við Suðurfjarðarveg er heldur flýtt.Þetta kemur í ljós þegar lesið er í gegnum drög að samgönguáætlun sem Sigurður Ingi Jóhannsson, innviðaráðherra, kynnti í grófum dráttum á fundi í hádeginu í gær. Áætlunin í heild sinni varð aðgengileg í samráðsgátt stjórnvalda eftir fundinn. Þar eru framkvæmdir tímasettar og fjárveitingar skilgreindar. Greint er milli ára 2024-27 en síðan tímabilanna 2029-33 og 34-38.
Hringtengingunni frestað
Þar kemur fram að ekkert fjármagn er ætlað til Fjarðarheiðarganga á árinu 2024. Í eldri áætlunum hafði verið gert ráð fyrir að gangagröftur hæfist þá. Sjö milljarðar eru hins vegar settir í göngin árið 2025 og þau eiga að klárast á tímabilinu 2029-33. Fram kemur í athugasemd að jarðgangagerð eigi að fjármagna með gjaldtöku að umferð.
Skilgreint er fjármagn í undirbúning ganga undir Siglufjarðarskarð og Hvalfjörð á allra næstu árum. Samkvæmt núgildandi samgönguáætlun áttu göng áfram frá Seyðisfirði til Norðfjarðar um Mjóafjörð að vera næst á eftir Fjarðarheiðargöngum. Samkvæmt jarðgagnaáætlun sem birt var í gær eru þau hin sjöundu í röðinni. Í millitíðinni var unnin sérstök skýrsla fyrir Vegagerðina um jarðgangakosti í landinu.
Flugstöðin í Reykjavík gengur fyrir
Þrátt fyrir að í flugstefnu Íslands hafi uppbygging á Egilsstaðaflugvelli verið sett í forgang meðal varaflugvalla er það ekki næsta stórframkvæmd á flugvöllunum. Til stendur að hefja endurbyggingu flugstöðvarinnar í Reykjavík strax á næsta ári og á hún að vera tilbúin árið 2026.
Um milljarður króna er áætlaður í flughlað og akbraut á Egilsstaðaflugvelli árin 2026-27, 4,2 milljarðar 2029-33 og 2,6 milljarðar 2034-38. Framkvæmdin er lykilatriði í að völlurinn geti tekið við fleiri vélum og þannig sinnt hlutverki sínu sem varaflugvöllur. Á síðasta tímabilinu er einnig gert ráð fyrir einum milljarði í viðhald flugbrautar.
Af öðrum helstu flugvallarframkvæmdum á Austurlandi er það að frétta að 50 milljónir eru áætlaðar í viðhald bygginga á Vopnafirði á næstu tveimur árum, 60 milljónir í flugbrautina á Norðfirði 2027 en þar áður 95 í brautir á Suðausturlandi 2025-26.
Axarvegur veltur á einkafjármögnun
Á kynningarfundinum í gær sagði Sigurður Ingi að unnið væri að fjármögnun Axarvegar, sem átti að verða samvinnuverkefni með einkaaðilum. Þær áætlanir hafa ekki gengið eftir. Í núgildandi samgönguáætlun átti hann að vera tilbúinn í ár. Í drögunum sem birtust í gær er Axarvegur settur fram miðað við að ríkið fjármagni hann að fullu. Undirbúningur hefst þá 2027, vinna 2028 en þunginn í framkvæmdunum er á öðru tímabili, 2029-33. Í athugasemd segir að áætlað sé að fjármagna framkvæmdina að hluta með gjaldtöku.
Fleiri framkvæmdir eru komnar á dagskrá í nágrenni Djúpavogs. 400 milljónir eru settar í að færa til veginn við Teigarhorn árið 2027. Þá eru 100 milljónir eyrnamerktar árin 2029-33 í nýja tengingu frá þjóðvegi 1 að hafnarsvæðinu, eins og það er orðað í texta.
Suðurfjarðavegi áfangaskipt
Suðurfjarðarvegi er skipt upp í áfanga. 1,3 milljarður króna er áætlaður í framkvæmdir í botni Reyðarfjarðar árin 2027-28. Einbreið brú verður fjarlægð af Sléttuá, ný brú sett á Fossá og ný tenging gerð við Þórudalsheiðarveg.
Á öðru tímabili, 2029-33 eru alls fjórir milljarðar áætlaðir í annars vegar veginn frá þéttbýlinu í Fáskrúðsfirði að Vík og frá Stöðvarfirði að Kambanesskriðum. Tekið er fram að í þessum framkvæmdum verði einbreiðar brýr á Dalsá og Tunguá í botni Fáskrúðsfjarðar aflagðar sem og einbreið brú yfir Stöðvará í Stöðvarfirði.
Á þriðja tímabili, 2034-38, eru 1,7 milljarðar ætlaðir í að klára það sem út af stendur, frá Vík í Kambanesskriður. Samkvæmt núgildandi samgönguáætlun voru engir fjármunir ætlaðir í veginn fyrr en 2030-34 og var þá talað um hann sem eina framkvæmd, frá Reyðarfirði að Breiðdalsvík.
Stálþil til að verja veginn um Grænafell fyrir snjóflóðum virðist tefjast. Á núverandi áætlun eru 200 milljónir ætlaðar í verkið 2025-29 en eru núna 500 milljónir 2029-33. Ljóst er þó að hönnun verksins hefur þokast áfram síðustu ár.
Vegir á Fljótsdalshéraði
Í nýja Lagarfljótsbrú milli Egilsstaða og Fellabæjar eru áætlaðir 4,6 milljarðar á síðasta tímabili, 2034-38. Upphaf framkvæmda var áður áætlað á tímabilinu 2034-38. Á undan, 2029-33, eru 800 milljónir settar í færa veginn suður fyrir Egilsstaði og tengja hann núverandi þjóðvegi inn í Hérað með hringtorgi. Færslan er hluti af framkvæmdum við Fjarðarheiðargöng.
Annars staðar á Héraði eru settar 300 milljónir til að endurbæta veginn upp í Klaustursel, sem jafnframt liggur að Stuðlagili og klæða hann. Það er þó ekki fyrr en 2029-33. Á sama tíma eru 100 milljónir ætlaðar til að laga veginn neðan við bæinn Strönd á Völlum.
Hafnarframkvæmdir
Ríkið leggur til um helming fjár til ýmissa hafnaframkvæmda á Austurlandi. Á Vopnafirði stendur til að lengja löndunarbryggjuna og eru 350 milljónir settar í það árin 2024-26. Á Seyðisfirði á að endurbyggja Angróbryggjuna fyrir tæpar 60 milljónir á næsta ári og síðan 2026-28 lengja Strandarbakka fyrir um 200 milljónir.
Til Borgarfjarðar er veitt 60 milljónum á næstu tveimur árum til að að lengja varnargarð og gera nýja löndunarbryggju. Árið 2026 eru síðan ætlaðar 26,6 milljónir í að lengja Hólmabryggju. Loks er gert ráð fyrir að endurbyggja ferjuaðstöðuna í Mjóafirði.
Út af standa síðan minni framkvæmdir svo sem slitlag á styttri malarkafla. Fjármagn er skilgreint til þeirra í heild en ekkert um einstaka fletti. Fyrirvari hefur verið settur um að forgangsröðun sé metin út frá fjármálaáætlun sem endurskoðuð er árlega. Sú endurskoðum geti breytt forgangsröðuninni.
Mynd: Mannvit/Vegagerðin
