Eldurinn við álverið slökktur
Eldur í spenni við álver Alcoa-Fjarðaáls í Reyðarfirði var slökktur rétt fyrir klukkan tíu í kvöld. Um tveimur tímum áður komst straumur á álverið. Með því tókst að koma í veg fyrir að ál storknaði í kerjum en slíkt hefði orðið mikið tjón.
Þrír slökkviliðsmenn verða á vakt við álverið í nótt. Um fjörutíu slökkviliðsmenn komu að slökkvistarfinu, úr Fjarðabyggð og af Fljótsdalshéraði.
Sprenging varð í spenninum um klukkan fimm í dag. Rafmagn fór þá af álverinu og hluta Austurlands. Álverið þolir fimm tíma rafmagnsleysi en ef ál storknar í kerjum verður mikið tjón.
Spennirinn var við innri enda álversins. Mikill eldur var í honum um tíma og teygðu eldtungurnar sig í hæð á við brún kerskálans. Mikil olía var í spenninum og því gekk slökkvistarfið hægt.
Engin slys urðu á fólki en hluti álverssvæðisins var rýmdur.
