Elvar Jónsson: Það er búið að kasta stríðshanskanum
Fréttir • This email address is being protected from spambots. You need JavaScript enabled to view it. • Fyrst birt 25. feb 2013 15:21 • Uppfært 08. jan 2016 19:23
Elvar Jónsson, oddviti Fjarðalistans í bæjarstjórn Fjarðabyggðar, segist vera tilbúinn í átakastjórnmál síðasta árið af yfirstandandi kjörtímabili ef það sé vilji meirihlutans. Bæjarfulltrúar hafa deilt harkalega á samfélagsmiðlum undanfarna daga um nýja gjaldskrá almenningssamganga.
„Ég er afar ósáttur við að vera kallaður lýðskrumari eða popúlisti því ég tel mig hafa fullt til míns máls í þessu máli,“ sagði Elvar á bæjarstjórnarfundi í síðustu viku.
Bæjarfulltrúar höfðu fyrir fundinn rætt nýja gjaldskrá almenningssamgangna í sveitarfélaginu á samfélagsmiðlum eins og Facebook. Fulltrúar minnihlutans í Fjarðalistanum hafa gagnrýnt að sveitarfélagið sé ekki eitt gjaldsvæði en fulltrúar meirihluta Sjálfstæðis- og Framsóknarflokks segja að ekki séu til fjármunir í slíkar niðurgreiðslur.
Í þessum umræðum sakaði Jens Garðar Helgason, formaður bæjarráðs, fulltrúa minnihlutans um „pólitískar keilur og poppúlisma“
„Til þessa hefur verið góð sátt í bæjarstjórninni en nú er búið að kasta stríðshanskanum. Ég veit ekki hvort við ætlum að eyða síðasta árinu okkar í bæjarstjórn í átakastjórnmál í boði formanns bæjarráðs en við í Fjarðalistanum erum tilbúin í það.“
Elvar sagði það högg fyrir vinnu við sameiningu Fjarðabyggðar í eitt sveitarfélag að íbúum yrði mismunað eftir búsetu í gjaldskránni.
„Það er mikill sorgardagur í sameiningu Fjarðabyggðar ef þessi tillaga nær fram að ganga. Íbúarnir verða að upplifa jöfnuð á sem flestum sviðum. Þessa tillögu verður að skoða upp á nýtt áður en meiri skaði er skeður.“
