Endurreisa Þroskahjálp á Austurlandi

„Við erum tvær, ég og Elsa Guðný Björgvinsdóttir, sem höfum leitt undirbúninginn. Félagið hefur verið í dvala í mörg ár og okkur langar til að það taki til starfa á ný. Okkur finnst rétt að láta reyna á það eða leggja það niður.

Landssamtökin hafa líka ýtt á okkur síðustu misseri með þetta og við fáum góða aðstoð þaðan. Formaður og skrifstofustjóri koma á fundinn á morgun. Samtökin á Vesturlandi voru endurvakin með svipuðum hætti síðasta haust,“ segir Kolbrún Erla Pétursdóttir.

Þroskahjálp eru regnhlífasamtök félaga sem vinna að réttinda- og hagsmunamálum fatlaðs fólks. Meðal aðildarfélaga eru Downs-félagið, Einhverfusamtökin, Styrktarfélag lamaðra- og fatlaðra, ýmis foreldrafélög barna með fatlanir og landshlutasamtökin.

Kolbrún segir svæðisfélögin skipta máli til viðbótar við landsfélagið. „Tilgangur Þroskahjálpar á Austurlandi er að foreldrar barna með fatlanir, fólk með fatlanir og aðstandendur hafi málsvara í heimabyggð. Það geta alltaf komið upp ágreiningsmál eða þörf á baráttu fyrir réttindum.

Þetta er líka vitundarátak, að láta vita að í fjórðungnum sé aðili sem hægt er að leita til með aðstoð, svo sem að sækja réttindi. Við viljum líka auka tengslin milli fólks hér fyrir austan. Þótt stóra baklandið sé í Reykjavík er oft langt að leita þangað,“ segir hún.

Fundurinn hefst klukkan 11 á morgun, laugardag og verður haldinn í Sláturhúsinu á Egilsstöðum.