Enn fækkar Austfirðingum

Höfundur: Gunnar Gunnarsson • Skrifað: 05. janúar 2011.

Austfirðingum fækkaði um tæplega 200, eða 1,7%, á seinasta ári. Hlutfallslega fækkar mest í Fljótsdal og á Seyðisfirði en á Djúpavogi og Borgarfirði fjölgar íbúum.

Þetta kemur fram í tölum Hagstofunnar yfir mannfjölda í austfirskum sveitarfélögum frá 1. desember. Sé miðað við starfssvæði Sambands sveitarfélaga á Austurlandi (SSA), sem nær frá Vopnafjarðarhreppi í norðri til Djúpavogshrepps í suðri, voru íbúar svæðisins þá 10.190 en voru 10.362 á sama tíma í fyrra. Fækkunin er upp á 1,66% eða 172 einstaklinga.

Mest er fækkunin í Fljótsdalshreppi, 11%. Íbúunum fækkar úr 89 í 79. Seyðfirðingum fækkar úr 706 í 669 eða um 5,2%.

Hlutfallslega fjölgar mest í Borgarfjarðarhreppi, heil 3,7%. Sú fjölgun skiptir litlu fyrir svæðið í heild því íbúum í sveitarfélaginu fjölgar úr 135 íbúum í 140. Íbúum fjölgar einnig í Djúpavogshreppi.