Enn von á talsverðri úrkomu

Stærsta skriðan sem vitað er um féll niður farveg úr Strandartindi niður á Borgartanga í morgun. Ekki er ljóst hve stór hún er þar sem svæðið undir tindinum er lokað vegna skriðuhættu og slæmt skyggni yfir fjörðinn.

Skriðan fór niður í malarnámu á tanganum. Eitt tæki lenti í henni. Ekki er ljóst hvort tjón hafi orðið á því. Mögulegt er að skriðurnar hafi verið tvær niður farveginn.

Lítil skriða féll í námunda við bæinn Eyri í sunnanverðum Reyðarfirði. Þá hafa fallið skriður við gangamunna Norðfjarðarganga í Fannardal. Einhverjar þeirra ná niður undir veg.

Jón Kristinn Helgason, fagstjóri skriðuvaktar hjá Veðurstofunni, segir viðbúið að tilkynningum um skriður eða aðrar skemmdir í vatnsveðrinu á Austfjörðum síðustu daga, fjölgi þegar hægist um á morgun. Skyggni til fjalla hefur víða verið takmarkað og fólki ráðlagt að halda sig frá þekktum skriðusvæðum.

Áfram er spáð mikilli úrkomu og viðbúið að 70-80 mm eigi enn eftir að falla þar sem mest lætur. Mesta úrkoma á landinu frá miðnætti er á Eskifirði, 111 mm. Í Neskaupstað er úrkoman orðnir 105 mm. Þar hefur bætt verulega í þegar liðið hefur á daginn, 33,3 mm mældust þar frá klukkan 13-16 í dag.

Appelsínugul viðvörun er í gildi til miðnættis á Austfjörðum en gul á Austurlandi. Gul viðvörun tekur svo við fyrir firðina til klukkan fjögur í nótt.

Jón Kristinn segir von á að úrkoman standi fram til klukkan tvö í nótt. Eftir það fari að draga úr henni samhliða því sem kólnar í veðri og heldur lægir. Áfram verður fylgst náið með þróun mála eystra af hálfu Veðurstofunnar og almannavarna.

Mynd: Steinn Jónasson