Færa út kvíarnar hjá Hótel Tanga á Vopnafirði
„Það eru öll herbergin hjá okkur bókuð fram í marsmánuð 2023 svo við reynum að bjarga okkur eins og hægt er,“ segir Árný Birna Vatnsdal, hótelstýra á hótel Tanga á Vopnafirði, en hótelið færir út kvíarnar á næstunni.
Hóteleigendur hafa fest kaup á íbúðarhúsi í bænum og hafa eytt síðustu vikum í að breyta því í gististað út af fyrir sig en starfsmenn Íslenskra aðalverktaka sem vinna að stórhýsi Jim Radcliffe í firðinum leigja öll herbergi á hótelinu sjálfu næstu mánuðina. Það því ekki úr miklu að velja fyrir ferðamenn í bænum sjálfum þó sveitagisting sé í boði í grenndinni.
Árný segir að nú sé beðið leyfisveitinga til að hefja útleigu á herbergjunum en þar um að ræða fjögur herbergi sem í geta dvalist allt að því sjö einstaklingar.
„Það er allt komið nema leyfin og þau fáum við vonandi á næstu vikum og þá förum við að auglýsa. Húsið situr hátt í bænum og með ágætu útsýni og sannarlega góður kostur ef fólk þarf gistingu hér í bæ.“
