Fallið frá kröfum um að Skrúður og Bjarnarey verði þjóðlendur
Fréttir • This email address is being protected from spambots. You need JavaScript enabled to view it. • Fyrst birt 16. sep 2025 10:03 • Uppfært 16. sep 2025 10:59
Fjármála- og efnahagsráðherra, fyrir hönd ríkisins, hefur fallið frá nærri öllum þjóðlendukröfum ríkisins í eyjar og sker á Austfjörðum. Óbyggðanefnd mun aðeins þurfa að úrskurða um örfáa staði á svæðinu.
Ríkið lýsti fyrst kröfum í eyjar og sker í febrúar í fyrra. Þá var Papey eina eyjan sem var undanskilin kröfum. Ráðherra endurskoðaði kröfurnar í kjölfar mótmæla og birti nýjar kröfur í október fyrir ári.
Þá höfðu kröfur í marga staði verið dregnar til baka, meðal annars í Hafnarhólma á Borgarfirði. Eftir stóðu kröfur í 105 eyjar og sker á Austurlandi, sem í skilgreiningu Óbyggðanefndar eru báðar Múlasýslurnar og Skaftafellssýslurnar.
Morgunblaðið greindi fyrst fjölmiðla frá því að ráðuneytið hefði á föstudag sent nefndinni bréf þar sem fallið er frá enn fleiri kröfum. Í því segir meðal annars að eyjar og sker tilheyri jörðum þar ef þeirra er getið í landamerkjabréfi, eða fjallað um nýtingu þeirra af viðkomandi jörð í áreiðanlegum heimildum.
Fallið frá kröfum í helstu eyjar
Á þessu víðfeðma svæði standa þá eftir kröfur í 25 eyjar og sker, um fjórðungur þeirra sem haldið var inni eftir síðustu yfirferð. Meðal þeirra staða sem ríkið fer fram á úrskurð um eru Svertlingar á Héraðsflóa, Gvöndarnessfles milli Fáskrúðsfjarðar og Stöðvarfjarðar og Gerpisfles.
Bjarnarey, milli Vopnafjarðar og Héraðsflóa og Skrúður á Fáskrúðsfirði eru meðal þekktustu staðanna sem fallið er frá kröfum í á Austfjörðum. Einnig má nefna Seley úti fyrir Reyðarfirði og þann hluta Hólmanna sem kröfur voru gerðar í.
Í kortasjá Óbyggðanefndar er hægt að sjá stöðu krafna, staðir sem eftir standa eru bláir en þeir sem nú er fallið frá eru fjólubláir.
