Fjarðabyggð, ME og VA úr leik í spurningakeppnum
Veturinn virðist ekki gjöfulur fyrir austfirsk spurningalið.
Fljótsdalshérað datt í fyrstu umferð spurningakeppninnar Útsvars og á
föstudag féll Fjarðabyggð úr leik. Menntaskólinn á Egilsstöðum og
Verkmenntaskóli Austurlands eru fallnir út úr Gettu betur.
Fjarðabyggð tapaði á föstudagskvöld fyrir Álftanesi, 73-82 í Útsvari. Fjarðabyggð var yfir lengst af í keppninni en staðan snérist í stóru spurningunum í lokin. Fjarðabyggð átti mögleika á að stela sigrinum í seinustu spurningunni en svöruðu rangt.
Menntaskólinn á Egilsstöðum féll á fimmtudagskvöld úr leik í Gettu betur þegar liðið tapaði fyrir Menntaskólanum við Hamrahlíð. ME-ingar voru yfir 16-15 eftir hraðaspurningar en MH-ingar sigu fram úr í bjölluspurningum og unnu 19-23.
Verkmenntaskóli Austurlands féll úr leik á seinasta keppniskvöldi fyrstu umferðar þegar lið hans tapaði 8-9 fyrir Menntaskólanum í Kópavogi.
