Fjarðabyggð ekki svarað áköllum eldri borgara á Eskifirði um tólf ára skeið
Sveitarfélagið Fjarðabyggð hefur ekki svarað ítrekuðum bréfum með óskum og ábendingum frá Félagi eldri borgara á Eskifirði um bráðnauðsynlegt viðhald á félagsheimilinu Melbæ um tólf ára skeið. Þetta er mjög harmað í nýjustu fundargerð bæjarráðs.
Á síðasta fundi bæjarráðs var tekið fyrir enn eitt bréfið frá félaginu þar sem bréfritarar ítreka enn og aftur óskir og áköll um bráðnauðsynlegt viðhald og endurbætur á félagsheimili þeirra Melbæ.
Í þessu nýjasta bréfi harmar félagið það virðingarleysi sem stjórn Fjarðabyggðar hefur sýnt félaginu á liðnum árum en undir það skrifa allir fimm stjórnarmenn félagsins. Þar segir meðal annars:
„Forsaga þessa máls er mjög löng eða allt frá því að félagið tekur við húsinu, sem var [upprunalega] byggt sem leikskóli. Til dæmis er eldhúsið hannað sem afdrep fyrir starfsfólk leikskóla en ekki sem framleiðslueldhús fyrir þá starfsemi sem þar fer fram í dag. Starfsemin því á undanþágum frá þeim reglum sem í gildi eru fyrir hliðstæða starfsemi. [...] Meðfylgjandi eru afrit af samskiptum Félags eldri borgara, heilbrigðiseftirlits og bæjarstjórnar frá árinu 2011. Aldrei hafa yfirvöld látið svo lítið að svara póstum.“
Bréfið fékk umfjöllun í bæjarráði á mánudaginn var þar sem samskiptaleysið var harmað og bæjarstjóra falið að svara þessu síðasta bréfi. Jafnframt lét bæjarráð bóka að „farið verði í viðhald innan ramma fjárhagsáætlunar 2024 og felur bæjarráð sviðsstjóra framkvæmda og umhverfissviðs að fylgja því eftir.“
