Frjálsíþróttir: Hafdís Anna í sínu fyrsta landsliðsverkefni
Fréttir • This email address is being protected from spambots. You need JavaScript enabled to view it. • Fyrst birt 29. júl 2025 11:00 • Uppfært 29. júl 2025 11:07
Hafdís Anna Svansdóttir frá Egilsstöðum tók um síðustu helgi þátt í fyrsta verkefni sínu með íslenska ungmennalandsliðinu í frjálsíþróttum þegar Norðurlandamót U-20 ára var haldið í Svíþjóð.
Hafdís Anna var valin í landsliðið fyrir árangur sinn í 400 metra hlaupi, en hún setti persónulegt met í síðasta mánuði þegar hún hljóp á 52,52 sek.
Hún náði glæsilegum árangri í Uppsala þegar hún bætti þennan árangur um 5/100 úr sekúndu. Hún varð áttunda í hlaupinu. Hafdís Anna æfir með Hetti en keppir á landsvísu undir merkjum UÍA.
Annar Egilsstaðabúi, Birna Jóna Sverrisdóttir, tók þátt í mótinu en hún æfir og keppir með ÍR. Hún á nokkur landsliðsverkefni að baki, meðal annars Norðurlandamótið í fyrra.
Hún tók þátt í sleggjukasti og kastaði 49,39 metra sem kom henni í sjötta sæti. Hún var nokkuð frá sínum besta árangri en lengsta kast hennar nú var þó þremur metrum lengra en á mótinu í fyrra.
Bæði Hafdís Anna og Birna Jóna verða meðal keppenda á Unglingalandsmóti UMFÍ sem fram fer á Egilsstöðum um næstu helgi.
Hjördís efst á verðlaunapalli á meistaramóti FRÍ í júní. Mynd: FRÍ/Hlín
