Glæða gamla hafnarsvæðið á Stöðvarfirði lífi með varanlegri sýningu
Leyfi hefur fengist til að setja upp varanlega sýningu á þeim bátum og skipum sem gerðu út frá Stöðvarfirði á sínum tíma við grjótgarðinn á gamla hafnarsvæðinu í bænum.
Sýningin mun bera heitið Stöðfirskir bátar og skip og er hluti af byggðaþróunarverkefninu Sterkur Stöðvarfjörður. Þessi hugmynd ein margra sem bæjarbúar sjálfir hafa bryddað upp á í því skyni að styrkja bæjarbrag og auka aðdráttarafl fyrir ferðafólk.
Á sýningunni verður öllum skipaflota Stöðfirðinga frá miðbiki síðustu aldar gerð skil á sérstökum skiltum sem fest verða á stóra steina við grjótgarðinn. Hver bátur og skip fær sitt eigið skilti og gestir þannig gluggað í sögu útgerðar frá bænum á árum áður.
Með þessu vonast hlutaðeigendur til að glæða mannlífið við þennan gamla miðpunkt bæjarins sem stendur fyrir neðan Sköpunarmiðstöðina í bænum. Ekki er loku fyrir skotið, takist vel til, að stækka sýninguna þegar fram líða stundir með fleiri sögumolum um lífið í bænum með myndrænum hætti.
