Hættir eftir áratuga starf fyrir Fjarðabyggð
Þóroddur Helgason lætur af störfum sem fræðslustjóri Fjarðabyggðar eftir fimmtán ára starf í byrjun ágúst. Ráðin hefur verið í hans stað Anna Marín Þórarinsdóttir.
Þóroddur er að láta af störfum fyrir aldurs sakir en hann hefur lengi verið áberandi í íþrótta- og félagslífi á Reyðarfirði og mun víðar í sveitarfélaginu. Fyrir utan árin fimmtán sem fræðslustjóri var hann um tuttugu ára skeið skólastjóri grunnskólans á Reyðarfirði og margir segja Þórodd lykilmann að halda uppi merki íslensku glímunnar síðustu ár og áratugi bæði í sveitarfélaginu og á landsvísu.
Við hans starfi tekur Anna Marín sem fædd er og uppalin á Fáskrúðsfirði. Hún hefur upp á síðkastið starfað sem skólastjóri Nesskóla og þar áður sem aðstoðarskólastjóri í grunnskólanum á Fáskrúðsfirði. Hún tekur formlega við af Þóroddi þann 1. ágúst.
