Hringveginum lokað og ræsi hafa ekki undan á Suðurfjörðum

Vegurinn í Lóni er í sundur á 50 metra kafla. Björgunarsveitir manna lokunarpósta við Höfn og Djúpavog þar sem fólk á ferð er upplýst um stöðuna.

Loftur Þór Jónsson, umdæmisstjóri Vegagerðarinnar á Austurlandi, segir ljóst að skoða þurfi aðstæður við ána en hún flæddi líka yfir veginn og lokaði honum í stórrigningu í febrúar. Huga þurfi betur að hönnun varnargarða þar.

Í Fáskrúðsfirði og Stöðvarfirði flæðir einnig yfir veginn þar sem ræsi hafa ekki undan. Vegirnir eru þó enn opnir en Vegagerðin fylgist með framvindu mála.

Mesta úrkoma á landinu frá miðnætti er á Fáskrúðsfirði, 67 mm en þar á eftir kemur Teigarhorn með 53 mm. Enn rignir hressilega á Fáskrúðsfirði en heldur hefur dregið úr úrkomu á Teigarhorni. Gul viðvörun er í gildi fyrir Austfirði vegna úrkomu til klukkan 13 í dag.

Eins er í gildi gul viðvörun vegna hvassviðris fyrir spásvæðið og sambærileg viðvörun gengur í gildi fyrir Austurland að Glettingi. Báðar gilda til 23 í kvöld. Spáð er 15-23 m/s úr suðri eða suðaustri og vindstrengjum við fjöll sem geta skapað hættu, einkum fyrir ökutæki sem taka á sig mikinn vind.

Engin verkefni hafa þó enn komið til kasta lögreglu eða björgunarsveita, eftir því sem næst verður komist.

Lokað er milli Djúpavogs og Hafnar. Mynd úr safni.