Jarðhæð Eskifjarðarskóla lokað vegna myglu og raka

Gripið var til aðgerða strax eftir að sveitarfélaginu barst skýrslan í gærmorgunn. Í janúar var tilteknum rýmum lokað eftir að þar hafði verið staðfest mygla.

Samkvæmt tilkynningu Fjarðabyggðar frá í gærkvöldi eru mestu raka- og mygluskemmdirnar á jarðhæð skólans. Þar hefur verið tónskóli, bókasafn og elsta deild leikskóla.

Þeirri hæð hefur verið lokað. Leikskóladeildin verður á efri hæðum skólans þar til ný lausn er fundin. Bókasafnið og tónskólinn verða lokuð á morgun, föstudag. Nemendur grunnskólans eru þá hvort sem er í fríi vegna starfsdags.

Skemmdir á öðrum hæðum skólans eru minni. Þar hafa verið stúkuð af ákveðin rými sem liggja undir skemmdum. Að öðru leyti verða þær nýttar í skólastarf út þetta skólaár.

Samkvæmt upplýsingum Austurfréttar verður haldið áfram að fara yfir skýrsluna og ákveða frekari viðbrögð við niðurstöðunum á morgun. Í tilkynningunni segir að stefnt sé að því að nánari upplýsingar liggi fyrir eftir helgi og tillögur um framhaldið verði þá kynntar fyrir starfsfólki, foreldrum og íbúum.