Jón Björn nýr formaður Sambands íslenskra sveitarfélaga

Jón Björn tekur við af Heiðu Björg Hilmarsdóttur, sem er nýtekin við sem borgarstjóri í Reykjavík. Í kjölfar þess ákvað hún að hætta sem formaður Sambandsins.

Jón Björn hefur verið varaformaður þess frá árinu 2022. Kjörið var á stjórnarfundi Sambandsins sem haldinn var í tengslum við landþing þess á fimmtudag.

Jón Björn hefur verið bæjarfulltrúi Framsóknarflokksins í Fjarðabyggð frá árinu 2010. Flokkurinn hefur allan þann tíma verið í meirihluta og Jón Björn þá forseti bæjarstjórnar, utan áranna 2020-23 þar sem hann var bæjarstjóri.

Hökt í samstarfinu í lokin

Í lok landsþingsins færði Jón Björn Heiðu þakkir fyrir störf hennar í þágu Sambands íslenskra sveitarfélaga. Hann sagði stjórnina hafa tekist á við mörg stór verkefni þar sem reynt hefði á samstarfið en oftast náðst sameiginleg niðurstaða. Hann sagði að heilt yfir hefði góð samvinna og samstarf ríkt í stjórn Sambandsins, þrátt fyrir hökt síðustu vikur en það væri nú að baki.

Með höktinu vísar hann væntanlega til deilna innan stjórnarinnar í kjaraviðræðum við kennara. Á fundi þess 21. febrúar síðastliðinn hafnaði stjórnin sáttatillögu ríkissáttasemjara. Í bókun fundarins segir að strax á vinnslustigi hafi stjórnin komið því á framfæri að henni hugnaðist ekki tillagan. Af fundargerðum Sambandsins er ekki annað að sjá en þeir stjórnarmenn sem mættu hafi verið sammála.

Jón Björn stýrði þeim fundi í fjarveru Heiðu Bjargar, sem boðaði forföll en myndun nýs meirihluta í Reykjavík var þá á lokametrunum. Daginn eftir lýsti hún því opinberlega yfir að hún teldi að samþykkja hefði átt tillögun og síðar að ekki væri útilokað að Reykjavíkurborg semdi sér.

Mbl.is greindi frá því í kjölfarið að stjórnarmenn hefðu verið ósáttir við þetta framferði Heiðu. Þá hafa deilur um tré við flugvöllinn í Reykjavík einnig skapað deilur milli Reykjavíkurborgar og sveitarfélaga í dreifbýli.