Jónína sækist eftir að verða ritari Framsóknarflokksins
Fréttir • This email address is being protected from spambots. You need JavaScript enabled to view it. • Fyrst birt 27. sep 2025 08:37 • Uppfært 27. sep 2025 08:48
Jónína Brynjólfsdóttir, forseti bæjarstjórnar í Múlaþingi og varaþingmaður í Norðausturkjördæmi, tilkynnti í gærkvöldi framboð sitt til ritara Framsóknarflokksins. Hún segir þörf á að færa flokkinn nær fólkinu á ný.
Fráfarandi ritari er Ásmundur Einar Daðason sem féll af þingi í nóvember. Hann tilkynnti fyrr í gær að hann væri hættur í stjórnmálum og þar með væri ritarastaðan laus.
Flokknum vegnaði illa í síðustu þingkosningum og fylgi hans heldur áfram að dala, samkvæmt könnunum. Jónína gerir þetta að umtalsefni í tilkynningu sinni þar sem hún segir flokkinn hafa „misst tengsl við kjósendur sem áður voru sterk.“ Því þurfi að efla innviði hans og „færa nær fólkinu á ný.“
Sveitarstjórnarkosningar verða 16. maí á næsta ári. Jónína segir að ritari flokksins verði að hafa tíma og tækifæri til að sinna grasrót flokksins, í stað þess að vera í mörgum öðrum hlutverkum. Hún kveðst vilja styðja við væntanlega framboðslista og miðla reynslu milli svæða þannig flokkurinn fari vel undirbúinn inn í kosningarnar. Öflugt framboð í sveitarstjórnum sé grunnurinn að sterkri framtíð Framsóknar.
„Framsóknarflokkurinn er leiðandi afl í íslenskum stjórnmálum. Með sterkri grasrót, samstilltu innra starfi og traustu samstarfi við samfélagið getum við endurheimt traust og aukið áhrif okkar bæði á landsvísu og í heimabyggð. Ég er reiðubúin að leggja mig alla fram til að þessi sýn verði að veruleika,“ segir hún.
Kosið verður á miðstjórnarfundi flokksins þann 18. október. Ritarinn er einn þriggja fulltrúa í framkvæmdastjórn flokksins. Hinir tveir eru formaðurinn, Sigurður Ingi Jóhannsson og varaformaðurinn, Lilja Alfreðsdóttir.
