Aprílgabb: Kasínó í Kleinunni?
Fréttir • This email address is being protected from spambots. You need JavaScript enabled to view it. • Fyrst birt 01. apr 2022 14:01 • Uppfært 04. apr 2022 09:00
Athafnamenn á Egilsstöðum skoða nú möguleikann á að opna spilavíti í bænum. Þeir telja markað í því með tengingu við alþjóðaflugvöllinn þangað sem spilaglaðir auðkýfingar geti komið á einkaþotum sínum.
Til stendur að hafa starfsemina í Miðvangi 2-4, sem betur þekkt sem Kleinan. Þar er rými að losna á jarðhæð þar sem fyrir liggur að Vínbúðin flytji þaðan út.
„Við vinirnir höfum lengi velt fyrir okkur hvernig efla megi Egilsstaði sem ferðamannastað.
Þegar þetta húsnæði datt upp í hendurnar á okkur ákváðum við að setja okkur í samband við eigendur spilastaða í Las Vegas til að kanna áhuga þeirra á að setja upp lítið krúttlegt kasínó hér, þar sem er alþjóðaflugvöllur fyrir beint flug erlendra auðkýfinga.“
Þetta segja þeir Sigurður Ragnarsson og Þráinn Lárusson, sem lengi hafa verið með rekstur í Kleinunni. Þráinn er að baki veitingastaðnum Salti og Fellabakstri á jarðhæðinni en Sigurður starfar á annarri hæð fyrir MT bókhald, sem hann seldi um síðustu áramót.
Hann segir vel hafa verið tekið í hugmyndirnar. „Þetta skiptir ekki miklu í þeirra heildarveltu en þeim virðist þykja þetta skemmtileg tilbreyting. Við erum komin í samband við MGM spilavítin, framkvæmdastjóri þeirra, Vestur-Íslendingurinn, David Jackson, ætlar sjálfur að stjórna framkvæmdunum.
Stjórn MGM Grand spilavítisins bauð fram tæki og búnað í spilavítið, jafnt spilaborð sem vélbúnað. MGM Grand Casino ætlar að skipuleggja ferðir á tveggja vikna fresti frá McCarran-alþjóðaflugvellinum í Las Vegas til okkar.
Við ætlum að skapa umhverfi sem býður upp á verulega slökun og endurnæringu. Okkar erlendu gestir, sem munu væntanlega standa undir 95% afkomunnar, munu geta notið íslenskrar fegurðar vel, bæði utandyra sem innan, meðan á dvölinni stendur, en til stendur að barinn verði svokallaður „Topp-laus bar“ að erlendri fyrirmynd. Þar mun þjóna fólk af að minnsta kosti tveimur fjölmennustu kynjunum, slíkt er skýlaus krafa íslensks samfélags í dag.
Við stílum einnig inn á Austfirðinga sem vilja komast í kynni við og mynda sambönd í hinum stóra viðskiptaheimi. Þetta ætti líka að lyfta upp nýja miðbænum á Egilsstöðum,“ útskýra þeir.
Gert er ráð fyrir að 20 ársverk verði til við nýja spilavítið. Farið er fram á mikla fagmennsku í þjónustunni en launin góð að sama skapi. Framundan er því mikil þjálfun áður en spilavítið opnar haustið 2023. Vonast er til að ráða sem mest af heimafólki. Tekið verður á móti umsóknum í húsnæði MT bókhalds milli klukkan 14:30-16 í dag.
Þráinn ásamt ameríska stórvesírnum David Jackon. Mynd: Aðsend
