Leita til ÍSOR til að meta borholur við Djúpavog
Hitaveita Egilsstaða og Fella, HEF-veitur, hyggst leita til fyrirtækisins Íslenskar orkurannsóknir, ÍSOR, til að fá úr því skorið hvers vegna heitavatnsleit við Djúpavog í vetur gekk ekki sem skyldi.
Töluverðar rannsóknir af hálfu HEF-veitna, áður en borinn Trölli var fenginn til að bora við Djúpavog í vetur eftir heitu vatni um tveggja mánaða skeið, gáfu til kynna sterkar líkur á nægu nægilega heitu vatni til að geta sinnt heitavatnsþörf íbúa og fyrirtækja á Djúpavogi til framtíðar.
Þrátt fyrir að borað hefði verið niður á rúmlega 800 metra dýpi á þeim stað sem fýsilegastur þótti fannst hvorki nægilega heitt vatn né í nægjanlegu magni og borun því hætt í byrjun apríl til að endurmeta stöðuna.
Úr hefur orðið að HEF-veitur hyggjast fá sérstakan mælingarbíl Íslenskra orkurannsókna til að koma austur og mynda og mæla þær holur sem þegar hafa verið boraðar á Djúpavogssvæðinu. Sá mælingarbíll er útbúinn til ýmis konar mælinga um einkenni og afkastagetu borhola og þær mælingar geta hugsanlega varpað ljósi á hvers vegna ekki var komið niður í það vatnsmagn né hitastig sem vonir stóðu til þegar borun hófst við Djúpavog í febrúar síðastliðnum.
Í ljósi niðurstaðna ÍSOR er hugsanlega að HEF-veitur kalli til bortæki sem þegar er til staðar í fjórðungnum í minniháttar borverkefni eða til að staðsetja næstu tilraunaholu.
Stærsti jarðhitabor landsins, Trölli, boraði niður á 800 metra dýpi við Djúpavog í vetur en árangurinn af því lítill sem enginn. Mynd HEF
