Loðnuleit hefst á ný á morgun

Polar Ammassak mun sigla frá Neskaupstað á morgun og Ásgrímur Halldórsson frá Hornafirði. „Þau leita suðaustur af landinu, hvort eitthvað sé að koma úr djúpunum þar,“ segir Guðmundur J. Óskarsson, sviðsstjóri hjá Hafrannsóknastofnun. Gert er ráð fyrir að leit þeirra taki 3-4 daga en vond veðurspá er á mánudag.

Heimaey frá Vestmannaeyjum fer á föstudag og siglir norðvestur fyrir land. Heldur meiri vonir hafa verið bundnar við að þar séu líkur á loðnu sem sé þá að koma undan hafís. Ekki hefur verið ákveðið hve lengi skipið verður þar en viðbúið er að það verði lengur á sveimi en hin tvö.

Ekki hefur enn fundist loðna í nægjanlegu magni þannig að óhætt sé talið að gefa út veiðikvóta fyrir vertíðina. Skip á ferð í kringum landið hafa horft eftir hvort loðna sé á ferðinni en Guðmundur segir engar fréttir hafa borist af loðnutorfum síðustu daga.