Makrílveiðar ganga vel og nánast allt fengist í íslensku lögsögunni
Makrílveiðar austfirskra útgerða ganga vel, fiskurinn almennt stór og vænn og nánast allt fengist innan íslensku lögsögunnar sem er fremur óvenjuleg staða.
Kjartan Reynisson, fulltrúi framkvæmdastjóra og útgerðarstjóri Loðnuvinnslunnar á Fáskrúðsfirði, sem segir yfir engu að kvarta svona á fyrstu metrum veiðanna.
„Uppsjávarveiðiskipið Hoffell hefur verið á makrílveiðum og er að klára að landa einhverjum 800 tonnum sem fengust innan lögsögu. Þetta er stór og flottur fiskur sem fer allur í manneldi en markaðirnir fyrir makrílinn eru fyrst og fremst í Austur-Evrópu, Póllandi og þar í kring.“
Loðnuvinnslan er aðeins á eftir öðrum að hefja makrílveiðarnar að þessu sinni en ástæða þess eru allnokkrar tafir sem urðu þegar skipið fór í slipp á Akureyri nýverið.
„Hoffellið tafðist verulega í slipp fyrir norðan sem gerði það að verkum að við misstum hreinlega af fyrstu vikunum í makrílveiðinni. Ástæða tafanna bara að sá slippur var yfirlestaður af verkefnum og því tók þetta mun meiri tíma en ella.“
