Makríllinn skapar Matís vinnu
Aukning á vinnslu síldar og makríls hefur bætt verkefnastöðu starfsstöðvar Matís í Neskaupstað. Stöðin hefur eflt þjónustu sína að undanförnu.
"Við hér hjá Matís í Neskaupstað höfum verið að auka við þjónustu við Heilbrigðiseftirlitið á Austurlandi varðandi úrvinnslu á sýnum, til dæmis af neysluvatni og sundlaugarvatni," segir Þorsteinn Ingvarsson, stöðvarstjóri.
Hjá Matís í Neskaupstað eru þrjú full stöðugildi. Makrílveiðar skapa stöðinni einnig fleiri verkefni.
"Aukning á vinnslu síldar og makríls til manneldis hefur einnig bætt verkefnastöðu okkar verulega."
