Mikil úrkoma og vatnavextir á Fáskrúðsfirði
Það var óhemju mikil rigning í gær á Fáskrúðsfirði og uppsöfnuð sólarhringsúrkoma nær 140 millimetrar samkvæmt upplýsingum Veðurstofu. Ekki eru fréttir af verulegum skemmdum, þó grafið hafi frá einhverjum ræsum.
Að sögn Trausta Jínssonar veðurfræðings á Veðurstofu Íslands eru úrkomumælingar tiltölulega nýlega hafnar á Fáskrúðsfirði og meðaltöl því ekki til. Auk þess hefur leiðinleg og viðvarandi bilun háð mælingunum. Mælirinn á Fáskrúðsfirði tekur stundum upp á því að senda frá sér upplýsingar um úrkomu upp á sirka 1 millimeter á klukkustund heilu sólarhringana og það þótt þurrt sé. Ekki hefur tekist að finna ástæðuna. Trausti veit þó ekki til þess að bilunin hafi verið áberandi nú upp á síðkastið og mælingarnar síðustu daga því trúlega réttar.
Samkvæmt upplýsingum frá Trausta var meðalúrkoma 1971 til 2000 í júlí á Norðfirði 82 millimetrar og 100 millimetrar á Dalatanga.
Sé miðað við frá kl. 0 til 24 hefur úrkoman á Fáskrúðsfirði í þessum mánuði farið upp í, 74 millimetra 1. júlí og 93 millimetra þann 3. júlí miðað við tæpa 140 millimetra í gær 7. Júlí og 22 millimetrar hafa fallið frá næstliðnu miðnætti.
Frá 1. til og með 7. júlí féllu alls 327 millimetrar af úrkomu á Fáskrúðsfirði á sama tíma féllu 268 millimetrar á Eskifirði og 229 millimetrar á Norðfirði, á öðrum sjálfvirkum stöðvum minna.
Ámóta mikil úrkoma hefur fallið á Hánefsstöðum við Seyðisfjörð og í Gilsá í Breiðdal, en þó ekki eins mikið og á Fáskrúðsfirði.
,,Þetta er allt óvenju mikil úrkoma. Mesta úrkoma í júlímánuði öllum, mældist í Vík í Mýrdal í júlí 1950, 525 millimetrar. Talsvert borð er því fyrir báru varðandi met, en þó er ekki liðinn nema fjórði hluti mánaðarins.
Mesta sólarhringsúrkoma sem vitað er um í júlí mældist á Hánefsstöðum við Seyðisfjörð þann 4. júlí 2005, það voru rúmlega 201 millimeter", sagði Trausti Jónsson veðurfræðingur.
Myndir á fréttavefnum Fáskrúðsfjörður.
