Miklar breytingar á hreindýraveiðum: Dýrin hafa fært sig sunnar á bóginn

Heimilt er að veiða allt að 1229 hreindýr á veiðitímabilinu í ár sem er fjölgun upp á rúmlega 200 dýr. Töluverð breyting innan svæða þar sem dýrin virðast hafa fært sig sunnar. Þá verður leyft að veiða dýr í nóvembermánuði.

Þetta kemur fram í auglýsingu sem Umhverfisstofnun sendi frá sér í morgun. Alls er leyfilegt að veiða 1229 dýr, 623 kýr og 606 tarfa. Það er fjölgun um 220 dýr frá því í fyrra. 

Stærsta breytingin er sú að ekki er lengur mestur kvóti á veiðisvæðum 1&2 sem yfirleitt hafa verið flokkuð saman. Stærsta veiðisvæðið í ár er svæði 7, Djúpavogshreppur. Í tilmælum Umhverfisstofnunar er gert ráð fyrir að stærstur hluti kvótans verði veiddur í Hamarsdal.

Í ár er leyft er að veiða 425 dýr á svæði 7 en þau voru aðeins 187 í fyrra. Það er meira en tvöföldun á kvótanum á svæðinu. Á svæði tvö, sem nær yfir svæðið norður frá Jökulsá á Dal austur að Grímsá,  aðeins þriðjungur kvótans eftir. Leyft er að veiða 122 dýr samanborið við 349 í fyrra.

Þá er þeim tilmælum beint til veiðimanna að veiða dýrin fyrst og fremst austan Jökulsár í Fljótsdal. Skýringin er að hreindýrum á Fljótsdalsöræfum hafi fækkað mikið undanfarin ár.

Heimilt er að veiða tarfa frá 15. júlí og standa þær til 15. september eins og verið hefur. Veiðitími kúa lengist um fimm daga í lokin, er frá 1. ágúst til 20. september.

Á veiðisvæði 8, Lónum og Nesjum, er heimilt að veiða 22 kýr af 68 á tímabilinu 1. – 30. nóvember. Á svæði 9, Mýrum og Suðursveit, má veiða allar kýrnar í nóvembermánuði. Nóvemberveiðin er ekki óþekkt hefur ekki verið leyfð undanfarin ár.