Möðrudalsöræfi og Fjarðarheiði ekki opin fyrir hádegi
Ekki eru líkur á að fært verði yfir Möðrudalsöræfi, Fjarðarheiði og Vopnafjarðarheiði fyrr en líður á daginn. Snjómoksturstæki eru að störfum á flestum vegum á Austurlandi.Talsvert bættist á páskasnjóinn í norðaustanhríðinni um helgar eins og veðurspáin gerði ráð fyrir. Fjölmargar leiðir, bæði á hálendi og láglendi, voru lokaðar í gær.
Þá tókst að opna nokkrar leiðir, til dæmis á Borgarfjörður þar sem zúmba-danshelgi stóð yfir. Vatnsskarðið lokaðist aftur í gær og er snjóblásari á leið þangað til að opna það.
Hægt var að opna víða á Fljótsdalshéraði í gær. „Við njótum góðs af sólinni þótt hún sjáist ekki. Það er ekki sjálfgefið að opna allar leiðir. Það er kominn mikill snjór og á þeim stöðum sem skaflar myndast þá eru þeir stórir,“ segir Jens Hilmarsson, yfirverkstjóri hjá Vegagerðinni í Fellabæ.
Þannig er staðan til að mynda á Strandarhálsi, milli Egilsstaða og Hallormsstað og við Ekkjufell og Þorleifará í Fellum. Þær leiðir teljast færar en verið er að moka þær betur.
Áhersla hefur verið lögð á að tryggja skólahald í Brúarásskóla. Þannig er búið að opna bæði Austurdal og Jökuldal auk þess sem vonast er til að leiðin um Hróarstungu opnist fljótlega. Búið er að ryðja út Hjaltastaðaþinghá að Vatnsskarði.
Upp í Austurdal þarf að senda plóg til að ryðja malarveginn betur. Sömu sögu er að segja um Norðurbyggðina í Skriðdal, en Skriðdalurinn er almennt þungfær. Þessi tæki er að fara af stað.
Moksturstæki lögðu af stað frá Vopnafirði, Mývatni og Egilsstöðum til að opna Vopnafjarðarheiði og Möðrudalsöræfi í morgun. Snjóblásari er að störfum í Skjöldólfsstaðamúla. Jens segir að upp úr hádegi skýrist staðan á þessum leiðum, það er hvenær þær geti opnað.
Snjóblásari lagði af stað upp Fjarðarheiði klukkan sex í morgun. Jens segir þar enn vonskuveður en svo virðist að úrkoman sé að minnka, eins og spáð hefur verið. Gangi allt eftir geti hún opnað milli 14 og 15 í dag. Hins vegar sé ástandið þar og veðurspáin þannig að hún lokist aftur í nótt.
Snjóþekja er orðin á Fagradal. Þar er skafrenningur og mjög blint um að fara. Á Austfjörðum er hált eða snjóþekja en nokkuð greiðfært sunnan Breiðdalsvíkur.
