Norsku skipi hjálpað til hafnar á Eskifirði
Varðskipið Freyja aðstoðaði í gær norska loðnuveiðiskipið Svanaug Elise til hafnar á Eskifirði eftir að skipið fékk í skrúfuna við veiðar austur af landinu.Frá þessu er greint í frétt frá gæslunni.
Skipið óskaði eftir aðstoð um kvöldmat á laugardag eftir að hafa fengið veiðarfærið í skrúfuna. Freyja hefur undanfarna daga verið á loðnumiðunum austur af landinu við eftirlit og gat því brugðist skjótt við.
Á tíunda tímanum var línu skotið yfir í norska skipið og dráttartaug fest. Um miðnætti hafði áhöfn norska skipsins tekið nótina um borð og var þá haldið til Eskifjarðar.
Siglingin þangað gekk vel, sem og að koma skipinu að bryggju, en það var tekið að síðu varðskipsins. Verkinu var lokið upp úr hádegi í gær. Svanaug er enn við bryggju á Eskifirði en Freyja er komin aftur á miðin.
Mynd: Landhelgisgæslan
