Óveðrið að skella á Austurlandi
Óveðurslægðin sem valdið hefur usla á stærstum hluta landsins frá því snemma í nótt er nú fyrst að koma inn á Austurland en spár gera þó ráð fyrir að vindhraði verði mun minni en von var á lengi vel.
Hvessa á skarpt hér austanlands fram að hádegi og því fylgir bæði snjókoma og jafnvel rigning á stöku stöðum. Veðurstofan gerir nú ráð fyrir allt að 16 metra vindhraða þegar verst lætur nú fyrir hádegi en vindhraði átti að fara yfir 20 metra samkvæmt spám í gærkvöldi. Því ákveðnar líkur á að Austurland sleppi æði vel miðað við aðra landshluta eins og staðan er núna.
Vindhraði á Reykjanesi og höfuðborgarsvæðinu fór töluvert yfir 40 metra í nótt og yfir 20 metra vindhraði mældist á Akureyri snemma í morgun. Rafmagn fór af allnokkrum svæðum vegna veðursins en þó aðeins tímabundið.
Allir helstu fjallvegir eru lokaðir samkvæmt upplýsingum Vegagerðarinnar. Það á við um veginn yfir Fagradal og Fjarðarheiði til dæmis en þeim var lokað af öryggisástæðum klukkan sex. Búast má við að þeir verði áfram lokaðir fram á daginn en frekari upplýsingar frá Vegagerðinni eru væntanlegar um klukkan 13.
