Rekstur Egilsbúðar laus til umsóknar
Rekstur Egilsbúðar í Neskaupstað hefur verið auglýstur laus til
umsóknar. Þar er félagsheimili Norðfirðinga, hótel og veitingastaður og
hefur verið svo árum skiptir.
Ölver ehf., sem rekið hafði Egilsbúð í tvö ár, hafði í haust verið í viðræðum við bæjaryfirvöld um stöðu reksturins sem lauk með því að Ölver sagði sig frá honum í desember.
Sveitarfélagið hefur nú auglýst eftir áhugasömum aðila til að reka félagsheimilið en markmið Fjarðabyggðar er að nýta húsið á sem fjölbreyttastan hátt fyrir samfélagið.
Við kaupin er viðhaft samningskaupaferli sem þýðir að tilboð verða skoðuð út frá fleiri sjónarmiðum en bara verðtilboði.
Egilsbúð er annað félagsheimilið á Austurlandi sem auglýst er á stuttum tíma en eins og Agl.is hefur greint frá er einnig leitað að rekstraraðila fyrir Valaskjálf á Egilsstöðum.
