Ríkisstjórnin fundar á Austurlandi

Ríkisstjórnarfundur var fyrst haldinn á Austurlandi vorið 2012, þá í tengslum við stofnun Austurbrúar.

Síðan hefur komist á hefð fyrir sumarfundum ríkisstjórnarinnar, sem í senn eru formlegir fundir ríkisstjórnarinnar en fylgt eftir með óformlegum vinnufundum. Þetta er sjötti sumarfundurinn, í fyrra var fundað á Vestfjörðum en áður hefur verið fundar í Snæfellsbæ, Mývatnssveit, á Hellu og Suðurnesjum.

Ríkisstjórnin kom einnig saman til skyndifundar á Egilsstöðum í júlí 2021 til að ákveða hertar sóttvarnaaðgerðir vegna Covid-faraldursins. Egilsstaðir voru valdir sem fundarstaður þar sem margir ráðherrar tóku sumarfrí sín eystra í fádæma veðurblíðu.

Hvað er á dagskránni?

Dagurinn hefst á formlegum ríkisstjórnarfundi á Egilsstöðum. Samkvæmt upplýsingum frá forsætisráðuneytinu verður að auki sest niður með fulltrúum sveitarfélaganna fjögurra á Austurlandi auk Sambands sveitarfélaga á Austurlandi og Austurbrú og rædd hagsmunamál þeirra. Klukkan 11:40 verður athöfn við Hótel Berayja í tilefni þess að 800 rampar hafa verið settir upp í átakinu Römpum upp Ísland. Formenn allra stjórnarflokkanna taka þar þátt. Eftir hádegi verður óformlegur vinnufundur ríkisstjórnarinnar.

Listi yfir þau málefni sem rædd verða á fundinum liggur ekki fyrir en staðfest hefur verið að Svandís Svavarsdóttir, matvælaráðherra, muni kynna ákvörðun sína hvort hvalveiðar verði leyfðar á fundinum. Hún kynnti niðurstöður vinnu starfshópa um sjávarútveg á ríkisstjórnarfundi í fyrradag.

Af öðrum málefnum á þeim fundi má nefna að forsætisráðherra ræddi dagskrá í tilefni 80 ára afmælis lýðveldisins á næsta ári og menningar- og viðskiptaráðherra kynnti skýrslu starfshóps um gjaldtöku og arðsemi íslensku bankanna. Á ríkisstjórnarfundi á föstudag fór fjármála- og efnahagsráðherra yfir stöðu efnahagsmála en hann kynnti í framhaldinu áætlanir um hagræðinu hjá ríkinu. Á sama fundi kynnti innviðaráðherra væntanlega samgönguáætlun.

Ráðherrar ríkisstjórnarinnar hafa sumir lengt ferðina austur og nýtt hana í fleira en fundinn. Í gær opnaði Lilja Alfreðsdóttir, ráðherra menningarmála, Vjelsmiðjuna á Seyðisfirði á ný og Þórdís Kolbrún Reykfjörð Gylfadóttir, utanríkisráðherra, opnaði vinnufund um útflutningstækifæri á Egilsstöðum.

Hlúa að stjórnarsamstarfinu

Talsverð athygli hefur verið á fundinum á Egilsstöðum vegna væntanlegrar ákvörðunar Svandísar en tímabundin frestun hennar á stórhvalaveiðum rennur út eftir daginn í dag. Ákvörðun hennar um bannið í byrjun sumars var afar umdeild og hefur einkum verið sýnilegur óróleiki innan Sjálfstæðisflokksins vegna hennar.

Lilja blés á þessa erfiðleika þegar hún opnaði Vjelsmiðjuna í gær. „Sumir hafa verið með skýringar um að þetta sé eins og erfitt hjónaband. Við erum mjög hamingjusöm og erum að hlúa að hjónabandinu með að fljúga hingað austur.“