Ráðuneytið: Gróf nálgun á ætlaða fækkun starfa
Sömu forsendum var beitt fyrir allar heilbrigðisstofnanir þegar reiknuð
voru út þau störf sem tapast geta við niðurskurð á framlögum ríkisins
til stofnananna. Talsmaður heilbrigðisráðuneytisins segir útreikningana
fela í sér grófa nálgun á ætlaðri fækkun starfa. Tölurnar voru ekki
bornar undir forstöðumenn heilbrigðisstofnana áður en þær voru birtar og
komu mörgum í opna skjöldu.
Jafnt starfsmenn heilbrigðisstofnana sem forstöðumenn þeirra voru slegnir eftir að hafa séð tölurnar í frétt Agl.is sem byggðist á skriflegu svari heilbrigðisráðherra við fyrirspurn þingmannsins Gunnars Braga Sveinssonar. Því fylgdi ítarleg útlistun á því hvaða starfsmenn myndu líklega missa vinnuna.
Forstöðumenn heilbrigðisstofnana sem Agl.is hefur rætt við eru óhressir með að hafa ekki verið hafðir með í ráðum áður en tölurnar voru birtar.
Margrét Erlendsdóttir, upplýsingafulltrúi ráðuneytisins, segir svarið byggja á vinnu sem fram fór í ráðuneytinu í sumar við undirbúning fjárlagatillagna. Á því stigi hafi ekki verið haft samband við forstöðumennina heldur byggt á upplýsingum úr launagrunni ríkisins.
Sömu aðferðafræði var þar beitt fyrir allar stofnanirnar. „Tekið var mið af samsetningu rekstrarkostnaðar heilbrigðisstofnana þar sem launakostnaður nemur að jafnaði um 75% af rekstri og áhrif fyrirhugaðs niðurskurðar reiknaður samkvæmt því. Starfsstéttir voru flokkaðar eftir starfaflokkun Hagstofunnar.“
Í svari við fyrirspurn Agl.is segir Martrét að ráðuneytið leggi áherslu á að útreikningarnir feli í sér grófa nálgun á ætlaðri fækkun miðað við fjárlagatillögurnar.
