Rýmingum aflétt í Neskaupstað

Þetta var ákveðið eftir fund Veðurstofunnar og almannavarna í morgun. Ekki hefur snjóað jafn mikið yfir helgina og óttast var í fyrstu.

Í Neskaupstað var rýmt á svæði fjögur, sem liggur frá innri enda snjóflóðavarnagarðanna og inn fyrir ofan athafnasvæði Síldarvinnslunnar sem og húsið Þrastarlundur sem stendur þar innan við. Á því svæði eru fyrst og fremst iðnaðarhúsnæði.


Þar er kominn bloti í snjóinn auk þess sem lítill snjór er í neðri hlutum hlíða. Ekki er búist við mikilli úrkomu þar í dag.

Rýming verður áfram í gildi á Seyðisfirði en þar voru hús utarlega í byggðarlagi norðanverðu rýmd. Þar hefur snjóað meira en á Norðfirði. Snjókomu er spáð áfram þar og viðbúið að skafi áfram í norðanátt fram eftir degi. Staðan verður metin aftur síðar í dag.

Ekki hafa borist fréttir af snjóflóðum í veðrinu, en það gæti skýrst að hluta til af lélegu skyggni.

Minnt er á hjálparsíma Rauða krossins, 1717.