Séra Kristín Þórunn nýr prestur í Egilsstaðaprestakalli
Séra Kristín Þórunn Tómasdóttir hefur verið ráðin sem nýr prestur í Egilsstaðaprestakalli. Þá er séra Brynhildur Óla Elínardóttir komin til starfa þar.Þrír sóttu um stöðuna sem auglýst var í byrjun árs. Valnefnd kaus Kristínu Þóru og hefur biskup Íslands nú staðfest ráðninguna.
Kristín Þórunn er fædd í Neskaupstað árið 1970. Þar hóf faðir hennar, sr. Tómas Sveinsson, sinn prestsferil en hann starfaði síðar í áratugi í Háteigskirkju í Reykjavík.
Kristín Þóra lærði guðfræði- og trúarbragðafræðinám á Íslandi, í Svíþjóð og í Bandaríkjunum. Hún hefur starfað sem prestur frá því 1998 við fjölbreyttar aðstæður í dreifbýli og þéttbýli, að því er fram kemur í tilkynningu Þjóðkirkjunnar.
Hún hefur alla tíð verið virk í samkirkjulegu starfi og komið að vinnu við þróun og mótun helgihalds og sálmavinnu.
Síðustu ár hefur hún verið búsett í Genf, Sviss, með fjölskyldu sinni þar sem eiginmaður hennar, sr. Árni Svanur Daníelsson leiðir samskiptastarf Lútherska heimssambandsins. Þar hefur hún starfað með lútherskum og anglikönskum söfnuðum í prestsþjónustu og öðrum hlutverkum.
Kristín Þórunn er ekki ókunnug prestakallinu því hún þjónaði þar síðasta vetur meðan sr. Þorgeir Arason var í námsleyfi.
Þá var sr. Brynhildur Óla Elínardóttir ráðin í prestakallið fyrir jól til að sinna afleysingum til 1. maí. Brynhildur er alinn upp í Merki á Jökuldal og stúdent frá Menntaskólanum á Egilsstöðum. Hún vígðist til starfa á Skeggjastað í Bakkafirði árið 1996 en hefur síðustu misseri gegnt störfum víða um land.
Mynd: Þjóðkirkjan/Árni Svanur Daníelsson
