Setning Neistaflugs færð inn í hús vegna veðurs
Skipuleggjendur Neistaflugs í Neskaupstað hafa ákveðið að flytja setningarathöfn hátíðarinnar sem fara á fram í kvöld inn í Egilsbúð sökum veðurs.
Verslunarmannahelgin byrjar ekki sem best veðurfarslega austanlands en víðast hvar í fjórðungnum er töluvert úrhelli og spár gera ráð fyrir að svo verði áfram fram á kvöldið. Sú er einnig staðan í Neskaupstað þar sem Birnir hyggst blása stuði í íbúa og gesti aðra.
„Við ákváðum að hafa vaðið fyrir neðan okkur því það er nokkuð mikil rigning og einhver vindur á að bætast við með kvöldinu svo við færum þetta inn í kvöld svo enginn rigni niður,“ segir María Bóel Guðmundsdóttir, framkvæmdastjóri hátíðarinnar. „Dagskráin breytist ekkert að öðru leyti að sinni enda er spáin ágæt á morgun og við hér tökum bara einn dag fyrir í einu.“
Dagskrá Neistaflugs þetta árið er æði fjölbreytt en hátíðin stendur langt fram á sunnudagskvöld. Þá dagskrá gefur að líta hér.
Eitt það sem seint mun þurfa að færa inn úr rigningu er hinn vinsæli brunaslöngubolti þar sem hverfi Neskaupstaðar takast á. Sú keppni fer fram á sunnudag. Mynd Fjarðabyggð
