Síldarvinnslan snéri við flutningaskipi á leið til Odessa
Gengi bréfa í Síldarvinnslunni í Neskaupstað hefur fallið síðustu daga vegna hernaðarátaka í Úkraínu, sem er mikilvægur markaður loðnu. Vörusending á leið þangað var stöðvuð og skipi snúið viðum leið og fréttir bárust af innrás Rússa.Þetta kemur fram í tilkynningu fyrirtækisins til Kauphallarinnar í morgun.
Þar segir að Úkraína hafi verið eitt mikilvægasta viðskiptaland Síldarvinnslunnar síðustu ár og þangað sé selt mikið af síld, makríl og loðnu. Undanfarin ár hafi Úkraína keypt um 1/3 frosinna uppsjávarafurða og meira þau ár sem ekki var veidd loðna.
Vegna þessa fylgjast stjórnendur Síldarvinnslunnar náið með þróun mála. Fyrirtækið á útistandandi viðskiptakröfur upp á um níu milljónir dollara, eða meira en 1,1 milljarð króna í landinu. Auk þess eru í geymslum þess loðnubirgðir ætlaðar þangað. Ekki er hægt að áætla hver áhrifin verða af átökunum á reksturinn.
Flutningaskipi með birgðum á leið til Odessa, einnar þeirra borga sem orðið hafa fyrir sprengjuárásum Rússa, var snúið við fyrir helgi og stefnir aftur til Íslands.
Gengi bréfa í Síldarvinnslunni hefur fallið í Kauphöllinni eftir að fréttir bárust af skærum í Úkraínu. Þau hafa hækkað heldur aftur í morgun en voru fyrir helgi komin niður undir 90, sem er það lægsta frá því fyrir loðnuvertíð. Það er þó hátt í samhengi við að gengi bréfanna, þegar þau voru fyrst skráð á markað í byrjun sumars, var rúmlega 60.
Í tilkynningu Síldarvinnslunnar eru stríðsátökin sögð hamtíðindi og hugur Síldarvinnslufólks sé hjá viðskiptavinum í Úkraínu sem og fólkinu öllu þar. „Öll fordæmum við þær gegndarlausu árásir sem úkraínska þjóðin er að verða fyrir.“
