Skerðingar á rafmagni munu vara lengur fram á vorið
Miðlunarstaða Hálslóns er með því allra lægsta sem sést hefur alla tíð frá gangsetningu Fljótsdalsvirkjunar árið 2007. Vegna þess og svipaðrar stöðu í öðrum lónum landsins þarf Landsvirkjun að skerða áfram raforku til viðskiptavina lengur en vonast var til.
Þetta kemur fram í tilkynningu sem Landsvirkjun sendi frá sér fyrr í morgunn. Þar segir að stofnunin eigi engra annarra kosta völ en framlengja skerðingar á raforku lengur fram á vorið en upphaflega var vonast til. Slíkt bitnar bæði á notendum tryggrar og ótryggrar orku.
Skerðingar vegna bágrar stöðu lóna hófust snemma á árinu austanlands en slíkt hefur til dæmis þýtt að mörg stærri fyrirtæki sem og fjarvarmaveitur sveitarfélaga á borð við Fjarðabyggð hafa annaðhvort þurft að brúka olíu ellegar beinlínis skerða starfsemi sína eða þjónustu.
Ekki er tekið fram hversu lengi þarf að beita skerðingum enda velti það á vorleysingum með komandi hlýindum. Tíðarfarið í vetur í vatnabúskap Landsvirkjunar hafi verið einstaklega óhagstætt enda að mestu verið kalt og þurrt víðast á landinu. Vonast var eftir að draga mætti úr skerðingum strax í byrjun maí en nú ljóst að það mun taka lengri tíma.
