Skoða vindorkukosti með dönskum aðilum en með skilmálum þó
Sveitarstjórn Fljótsdalshrepps hefur formlega samþykkt viljayfirlýsingu með danska fyrirtækinu OGA um að skoða kosti vindorkuvera í landi sveitarfélagsins.
Fyrirtækið OGA er óstofnað dótturfélag danska fjárfestingarsjóðsins Copenhagen Infrastructure Partners (CIP) en sá sjóður sérhæfir sig í fjárfestingum í endurnýtanlegri orku víða um heim. Það er CIP sem gert hefur samkomulag við meðal annars Landsvirkjun og Fjarðabyggð um uppbyggingu sérstaks græns orkugarðs á Reyðarfirði en það verkefni kallar á töluverða raforku sem ekki er til staðar í dag.
Að sögn Helga Gíslasonar, sveitarstjóra Fljótsdalshrepps, er vindorka vissulega eitthvað sem hreppurinn þarf að skoða gaumgæfilega með tilliti til orkuskipta framtíðarinnar en í þessu ákveðna tilfelli hafi náðst tiltölulega óvenjulegt samkomulag.
„Þess efnis að þeir dönsku muni ekki eingöngu kanna fýsileika þess að reisa vindorkugarða í landi sveitarfélagsins heldur ennfremur skrifa þeir upp á samstarf um að kanna því samhliða öll tækifæri til þróunar og uppbyggingar annarrar tengdrar eða ótengdrar starfsemi í sveitarfélaginu.“
OGA mun því geta hafið könnun á kostum þess að reisa vindorkuver á svæðinu en þeim er gert að kynna sveitarstjórn reglulega niðurstöður rannsókna, mælinga og eða áforma. Sveitarfélagið mun samhliða þessu meta hvort og hvernig niðurstöðurnar samrýmast hagsmunum íbúa í hvert skipti og ef sú er raunin vinna þeim þáttum brautargengi sem að sveitarfélaginu snúa.
Verkefni þetta verður kynnt af hálfu beggja aðila fyrir íbúum og landeigendum á næstunni en viljayfirlýsingin sjálf mun gilda næstu þrjú árin.
