Skólar opnir í Fjarðabyggð
Fréttir • This email address is being protected from spambots. You need JavaScript enabled to view it. • Fyrst birt 07. feb 2022 08:40 • Uppfært 07. feb 2022 08:41
Eftir athugun í morgun var ákveðið að skólar Fjarðabyggðar yrðu opnir í dag, þrátt fyrir appelsínugula veðurviðvörun.
Í tilkynningu Fjarðabyggðar kemur fram að eftir að hafa farið yfir veður og horfur í morgun hafi ekki þótt ástæða til að hafa skólana lokaða. Foreldrum og forráðafólki er í sjálfsvald sett hvort þau sendi börnin til skóla en eru beðnir um að láta skólana vita ef það er ekki gert.
Almenningssamgöngur falla niður að minnsta kosti fram að hádegi í sveitarfélaginu.
Í Múlaþingi var skóla aflýst á Egilsstöðum og í Fellabæ, á síðarnefnda staðnum spiluðu Covid-smit inn í. Ekki fundust upplýsingar á heimasíðum annarra skóla um stöðuna.
Allir fjallvegir svæðisins eru lokaðir, sem og leiðin milli Breiðdalsvíkur og Fáskrúðsfjarðar.
Samkvæmt yfirliti frá Veðurstofu Íslands er lægðin, sem hrellt hefur íbúa á suðvesturhorni landsins í nótt, á hraðri leið til norðausturs. Appelsínugular viðvaranir taka gildi á Austurlandi og Austfjörðum klukkan níu.
Veðrið á að ganga niður um hádegisbil, viðvörunin fyrir Austfirði gildir þó til 13:30.
