Tæpar 118 milljónir austur af landsáætlun um uppbyggingu innviða

Úthlutunin dreifist yfir þrjú ár og er misjafnt á hvaða tímabili verkefnin fá sinn styrk. Þannig er stærsta verkefnið eystra í ár þjónustuhús og fræðsluskilti við Helgustaðanámu, sem fá 16 milljónir í sinn hlut.

Önnur verkefni eru hins vegar stærri í heildina yfir þetta þriggja ára tímabil. Stærst er gömul ljósmyndastofa á Teigarhorni sem fær 27,5 milljónir á næsta ári. Þá verður einnig varið fjórum milljónum þar í frágang utanhúss fyrir gesti.

Næst stærsta verkefnið er fyrsti áfangi eldaskála, aðstöðu fyrir útivistarfólk, í Hallormsstaðaskógi á vegum Skógræktarinnar. Það fær 22,6 milljónir árið 2024.

Á Galtastöðum fram stendur til að byggja salernishús, klára móttökuhús og reisa nýjar girðingar. Í það verkefni er veitt alls 21,9 milljónum, nær öllu á næsta ári.

Landsáætlunin er verkefni sem unnið er eftir langtímaáætlun. Stórurð, Gerpissvæðið og Snæfell eru meðal þeirra staða sem koma nýir inn á áætlunina. Gerpissvæðið fær 1,7 milljón og Stórurð 2,4 í ár. Á báðum stöðum verður ráðist í aðkomuskilti og umbætur á gönguleiðum. Tíu milljónir fara í nýja göngubrú við Snæfell í ár.

Að endingu fá þrjú verkefni á austursvæði Vatnajökulsþjóðgarðs 11,5 milljónir. Í ár fara 3,5 milljónir í bættar merkingar á Snæfellsöræfum og í Krepputungu en á næsta ári fara annars vegar fimm milljónir í undirbúning vegna nýrrar móttöku í Krepputungu og þrjár milljónir í göngubrú yfir Volgu.

Teigarhorn. Mynd: Andrés Skúlason