Tvær milljónir til menningarverkefna í Fjarðabyggð
Stjórn Menningarstofu Fjarðabyggðar hefur samþykkt styrkveitingar til þrettán menningarverkefna á árinu en upphæð styrkjanna í heild að þessu sinni nemur tveimur milljónum króna.
Hæstu styrkirnir að þessu sinni voru annars vegar 300 þúsund króna framlag til Sinfóníuhljómsveitar Austurlands vegna frumflutnings á verkinu forStargazer og hins vegar sama upphæð til sirkuslistafélagsins Hringleiks sem áformar að setja upp götuleikhússýninguna Sæskrímslin. Pönktónlistarhátíðin Austur í rassgati fær 200 þúsund króna styrk að þessu sinni og það fékk líka Guðmundur Kristinn Höskuldsson til tónleikahalds í hinu nýja tónlistarhúsi BRJÁN Tónspil í Neskaupstað.
Aðrir viðburðir sem hlutu náð fyrir augum stjórnar Menningarstofu að þessu sinni af margvíslegum toga. Tveir styrkir til tónleikahalds í Tónlistarmiðstöð Austurlands, uppsetningar á ljósmyndasýningunni Milli fjallanna og sýningarröð ljósmyndarans Apolline Alice Penelope Barra, styrkur til bíósýninga á gömlu efni frá Eskifirði, útgáfu ljóðabókar og hljómplötuútgáfu auk annars.
Sem endranær voru styrkumsóknir mun fleiri og um mun hærri upphæðir en í boði voru að þessu sinni.
Sinfóníuhljómsveit Austurlands mun frumflytja verkið forStargazer eftir Charles Ross í Tónlistarmiðstöð Austurlands síðar á árinu.