Þurfti að ganga nokkurn spöl til að óska eftir aðstoð

Það var í hádeginu á laugardag sem óskað var eftir aðstoð vegna göngumanns sem hafði trúlega ökklabrotnað að göngu á leiðinni að Urðarhólavatni.

Urðarhólavatn inn af Borgarfirðinum sjálfum. Í tilkynningu Landsbjargar segir að ekkert símasamband hafi verði á slysstaðnum og því hafi annar einstaklingur úr gönguhópnum þurft að ganga nokkurn spöl til að komast í símasamband og hringja eftir hjálp.

Björgunarsveitarfólk frá Sveinunga á Borgarfirði var komið á staðinn um hálftíma eftir að útkallið barst og göngumaðurinn kominn í sjúkrabíl frá Egilsstöðum um einum og hálfum tíma eftir símtalið.

„Ég myndi segja að þetta hafi gengið mjög vel. Sjúkrabíllinn er ræstur út á sama tíma og við og er kominn á staðinn á einum og hálfum tíma,“ segir Hjálmar Elías Baldursson sem var í stjórnstöð á laugardaginn en um fimmtán félagar í Sveinunga tóku þátt í útkallinu.

Rigning var á svæðinu og talið er að göngumaðurinn hafi runnið til á leiðinni. „Hópurinn sem var með manneskjunni hafði búið mjög vel um hana,“ segir Hjálmar.

Um fjarskiptasambandið á svæðinu segir hann að til viðbótar við gloppótt símasamband sé þekkt að samband fyrir tetra-kerfi björgunarsveita og viðbragðsaðila sé dapurt á Austfjörðum. Á laugardaginn hafi VHF-talstöðvar reynst hvað best til að halda sambandi við björgunarsveitarfólk á vettvangi.

Sumarið hefur annars verið tíðindalaust hjá björgunarsveitafólki á Borgarfirði. „Sem betur fer hafa ekki verið nein önnur útköll í sumar. Það er gott miðað við þann fjölda sem er hér allt í kring á göngu,“ segir Hjálmar.

Mynd: Landsbjörg