„Tilvalið tækifæri fyrir tímamótasamvinnu,“
„Ég sé þarna tilvalið tækifæri fyrir tímamótasamvinnu útgerðar og bænda og að gamalt orð fái nýja merkingu; útvegsbændur virkja saman skóg.“
Svo sagði Ásmundur Friðriksson, þingmaður Sjálfstæðisflokksins, í pontu Alþingis í gær en þar fór þingmaðurinn að ræða um fyrirhugaða skógrækt Síldarvinnslunnar í Neskaupstað í landi Fannardals. Fyrirtækið hyggst með trjáræktun þar kolefnisjafna mengandi útblástur frá starfsemi sinni en verkefnið verður unnið í samvinnu við Skógrækt ríkisins.
Ásmundur taldi hins vegar galla á þessari áætlun austfirska fyrirtækisins að því er fram kemur hjá vefmiðlinum Kjarnanum. Útgerðarfyrirtækið ætti að nýta tækifærið til að fela skógarbændum að sinna slíkri ræktun og einbeita sér að útgerð.
„Fer ekki vel á því að útgerðin geri það sem hún er best í, að veiða fisk, og bændur sjái um landbúnaðinn og skógræktina sem þeir eru betri í en útgerðin? Samstarf um smávirkjanir gæti líka gagnast báðum aðilum. Ég sé þarna tilvalið tækifæri fyrir tímamótasamvinnu útgerðar og bænda og að gamalt orð fái nýja merkingu; útvegsbændur virkja saman skóg.“
Mynd: Bragi Þór Jósefsson/Alþingi.is
