Töluvert hráslagalegt veður framundan
Veðurhret æði algeng um og yfir páskana og eftir mikla hlýindaviku í veðurfarslegu tilliti austanlands er einmitt hret á leiðinni um helgina með nokkrum kulda, töluverðri snjókomu eða slyddu og hvassviðri í þokkabót langt fram í næstu viku.
Engar tveggja stafa hitatölur er að finna í veðurspám Veðurstofu Íslands næstu vikuna heldur er að kólna allnokkuð á nýjan leik og frá og með sunnudeginum fer hitastigið vart yfir fimm stig neins staðar á Austurlandi og næturfrost líklegra en ekki.
Þann sama dag gera veðurfræðingar ráð fyrir töluverðri snjókomu og slyddu víðs vegar í fjórðungnum og það verður ofankoma af því taginu fram á miðvikudaginn hið minnsta ef spár ganga eftir.
Enn verra að samhliða lægri hita og snjókomu gera fræðingarnir ráð fyrir töluverðum norðan- og norðaustan vindi marga daga í röð sem þýðir töluverða vindkælingu í þokkabót. Sunnu- og mánudagur sýnu verstir samkvæmt nýjustu spá með vindstyrk allt að 11 metra á sekúndu meðan hitastigið víðast verður rétt yfir frostmarki.
